Şriftin ölçüsü :

Saytın rəngi :

Şəkidə təhsil sahəsində əldə edilən uğurlar ürəkaçandır

08 sentyabr 2018 | 10:09

2017-2018-ci dərs ilində Şəkinin 96 ümumtəhsil məktəbində 24 min 730 nəfər şagird təhsil alıb. Bundan əlavə, 2032 nəfər 5 yaşlı uşaq 76 məktəbdə açılmış 117 qrupda məktəbəhazırlıq təlimi ilə məşğul olub. Tədris ilində 70 nəfərdən çox Şəki məktəblisi respublika miqyaslı müsabiqə, olimpiada və yarışlarda uğur qazanıb, Təhsil Nazirliyinin, digər nazirlik və komitələrin diplom, fəxri fərman, medal və qiymətli hədiyyələri ilə mükafatlandırılıblar. Fənn olimpiadalarının final turunda iştirak etmiş 19 məktəblidən bir nəfəri qızıl, 2 nəfər gümüş, 3 nəfər isə bürünc medala layiq görülüb.
AZƏRTAC-ın bölgə müxbiri xəbər verir ki, bu barədə Şəki rayonunun təhsil işçilərinin sentyabrın 7-də keçirilən ənənəvi konfransında məlumat verilib.
Konfransda Şəki Şəhər Təhsil Şöbəsinin müdiri Südabər İsmayılovanın 2017-2018-ci dərs ilinin yekunları və qarşıda duran vəzifələr barədə hesabat məruzəsi dinlənilib.
Bildirilib ki, ötən dərs ilində rayonun məktəblərində oxuyan 24 min 730 şagirdin 23 faizi dərs ilini əla qiymətlərlə başa vurub. Dərs ilinin yekunlarına görə, 1733 şagird tam orta təhsil, 2008 şagird isə ümumi orta təhsil haqqında attestat alıb. Sevindirici haldır ki, təhsilini əla qiymətlərlə başa vuran şagirdlərin hamısı yüksək balla ali məktəblərə qəbul olunublar.
Diqqətə çatdırılıb ki, 2017-2018-ci dərs ilində rayonda təmayül siniflərin şəbəkəsi daha da genişləndirilib. Belə ki, Şəkinin təmayülləşmə tətbiq edilən 24 ümumtəhsil məktəbində X siniflər üzrə 8 təmayül və 28 kombinə olunan təmayül siniflər, XI siniflər üzrə isə 3 təmayül sinif fəaliyyət göstərib. Bu siniflərdə təhsil alan 800-dən çox şagird müvafiq tədris planları və proqramları əsasında ayrı-ayrı fənlər üzrə mövzuları daha dərindən və hərtərəfli öyrənməyə səy göstəriblər.
Ötən dərs ilində Şəkinin ümumtəhsil məktəblərini bitirmiş 1733 məzundan 1279 nəfəri ali məktəblərə daxil olmaq üçün sənəd verib, onlardan 888 nəfəri tələbə adını qazanıb. Qəbul imtahanlarında məzunlardan 215 nəfəri 500-dən, 81 nəfər isə 600 baldan yuxarı nəticə göstərib. Ali məktəblərə qəbul olunanlar arasında rayonda fəaliyyət göstərən 72 tam orta məktəbin hamısının təmsilçiləri var. Şəhər 5 və 19 nömrəli tam orta məktəblərin məzunlarının demək olar ki, hamısı ali məktəblərə qəbul olunub.
Bildirilib ki, Şəkidə yeni məktəb binalarının tikintisi və təmiri geniş vüsət alıb. Son bir neçə ildə rayonda 30 yeni məktəb binası tikilib və ya əsaslı təmir olunub. Yeni inşa edilən 624 şagird yerlik Baş Zəyzid kənd tam orta məktəbi dərs ilinə hazırdır. Bundan əlavə, yeni dərs ilində 5 modul tipli məktəb də istifadəyə veriləcək.
Konfransda Şəki Şəhər İcra Hakimiyyətinin başçısı Elxan Usubov və Təhsil Nazirliyinin məsul nümayəndəsi Sübhi Kazımov çıxış edərək, ölkəmizdə təhsilə göstərilən yüksək dövlət qayğısından danışıb, müəllimlərə tövsiyyələrini bildiriblər.
Sonda respublika müsabiqəsinin qalibi olan müəllimlər mükafatlandırılıb.

Keçidlər