Şəkinin 2016-cı ilin doqquz ayının sosial-iqtisadi inkişafının yekunlarına və qarşıda duran vəzifələrə həsr olunmuş hesabat yığıncağı keçirilmişdir

2016-cı ilin doqquz ayında Şəki rayonunda faktiki qiymətlərlə 249 milyon 145 min manatlıq məhsul buraxılıb və xidmətlər göstərilib. Bu, ötən ilin müvafiq dövrü ilə müqayisədə 2 faiz çoxdur. Buraxılan məhsulun 7 faizi dövlət, 93 faizi qeyri-dövlət mülkiyyətinin payına düşür. Hesabat dövründə rayonda əmtəə dövriyyəsinin ümumi həcmi əvvəlki ilin müvafiq dövrü ilə müqayisədə 1,5 faiz artaraq 262 milyon 156 min manat təşkil edib. Doqquz ayda rayonda 1622 yeni, daimi iş yeri açılıb.
Bu faktlar 2016-cı ilin doqquz ayının sosial-iqtisadi inkişafının yekunları və qarşıda duran vəzifələrlə bağlı oktyabrın 24-də Şəki Şəhər İcra Hakimiyyətində keçirilən yığıncaqda səsləndirilib.
Şəki Şəhər İcra Hakimiyyətinin başçısı Elxan Usubovun hesabat məruzəsində qeyd olunub ki, Prezident İlham Əliyevin təşəbbüsü və rəhbərliyi ilə ölkəmizdə kənd təsərrüfatının inkişafında yeni mərhələ başlanıb. Regionların 2014-2018-ci illərdə sosial-iqtisadi inkişafına dair Dövlət Proqramının icrasının ikinci ilinin yekunlarına həsr olunan konfransda, həmçinin Nazirlər Kabinetinin 2016-cı ilin 9 ayının sosial-iqtisadi inkişafının yekunlarına həsr olunan iclasında dövlətimizin başçısı kənd təsərrüfatı sahəsində prioritet istiqamətləri qeyd edib və bu sahədə qarşıda duran vəzifələri müəyyənləşdirib.
Diqqətə çatdırılıb ki, Prezident İlham Əliyevin mövcud iqtisadi potensialdan daha səmərəli istifadə edilməsi ilə bağlı verdiyi tapşırıqların icrasını təmin etmək məqsədi ilə ötən müddətdə Şəki rayonunda da zəruri tədbirlər həyata keçirilib. Cari ildə rayonda 193 min ton taxıl istehsal olunub və məhsul istehsalı əvvəlki illə müqayisədə 7 min ton artıb. Artıq rayonda gələn ilin məhsulu üçün payızlıq taxıl səpininə də başlanılıb. Bu məqsədlə indiyədək 38 min hektar sahədə şum qaldırılıb, 4 min hektar sahədə səpin aparılıb.
Rayonda ənənəvi sahələrdən olan tütünçülüyün və baramaçılığın inkişafı istiqamətində zəruri tədbirlər həyata keçirilib. Cari ildə Şəkidə 785 hektar sahədə tütün əkilib və hazırda təsərrüfatlarda tütün yığımı davam edir. İndiyədək rayonda 2074 ton tütün istehsal olunub, məhsul istehsalı ötən ilin müvafiq dövrü ilə müqayisədə 524 ton artıb. Tütünçülük sahəsində 1895 nəfər kənd sakini mövsümü işlə təmin olunub.
Diqqətə çatdırılıb ki, 2016-cı ildə rayonda 8,5 ton barama istehsalı proqnozlaşdırılsa da, kümçülər tapşırığa artıqlaması ilə əməl edib, 9 ton 751 kiloqram yaş barama istehsal edilərək, “Şəki-İpək” ASC-yə təhvil verilib. Baramaçılığın yem bazasının möhkəmləndirilməsi məqsədi ilə cari ilin payızında rayon ərazisində 100 min ədəddən çox tut tinginin əkilməsi nəzərdə tutulur.
Bildirilib ki, dövlətimizin başçısının iri fermer təsərrüfatlarının, aqroparkların yaradılması, ixracyönlü məhsulların istehsalı ilə bağlı verdiyi tapşırıqların icrasını təmin etmək məqsədi ilə hazırda Şəkidə yerli sahibkarlar tərəfindən yeni layihələr həyata keçirilir. “Green Faktory” MMC tərəfindən Orta Zəyzid bələdiyyəsinin mülkiyyətində olan 108 hektar torpaq sahəsində müasir texnologiyalar əsasında yaradılan aqroparkın ərazisində 78 hektar sahədə İtaliya və Fransadan gətirilmiş müxtəlif meyvə - ərik, şaftalı, armud və gavalı tingləri əkilib. Əlavə olaraq, həmin ərazidə 24 hektar sahədə mebel sənayesini inkişaf etdirmək məqsədi ilə Türkiyədən gətirilmiş pavloniya ağacları əkilib.
Rayonda qərzəkli meyvə istehsalının inkişaf etdirilməsinə diqqət artırılıb, fərdi təsərrüfatlarda mövcud olan 456 hektar qoz, 979 hektar fındıq və 26 hektar şabalıd bağlarına aqrotexniki qulluq olunub. Yeni fındıq bağlarının salınması üçün rayon ərazisində 361 hektar sahədə torpağın əkinə hazırlanması və təmizləmə işləri aparılıb.
Hesabat məruzəsində, həmçinin ötən müddətdə Şəkinin mədəni həyatında baş verən yeniliklərdən ətraflı bəhs edilib. Bildirilib ki, TÜRKSOY tərəfindən 2016-cı il üçün “Türk dünyasının mədəniyyət paytaxtı” seçilən Şəkidə müddət ərzində bir sıra mədəni kütləvi tədbirlər keçirilib. Şəki şəhəri, eyni zamanda, 3 beynəlxalq festivala ev sahibliyi edib.
Yığıncaqda 2016-cı ilin doqquz ayında əhalinin təbii qaz, elektrik enerjisi, içməli su və digər xidmətlərlə təminatının yaxşılaşdırılması, təhsil, səhiyyə və mədəniyyət sahələrində həyata keçirilən tədbirlər, vətəndaşların qəbulu, onların ərizə və şikayətlərinə baxılması sahəsində görülən işlər ətraflı təhlil edilib, qarşıda duran vəzifələrə toxunulub.