“Şəki-İpək” ASC indiyədək istehsalçılardan 215 tona yaxın yaş barama tədarük edib
“Şəki-İpək” ASC tərəfindən respublikanın baramaçılıqla məşğul olan rayonlarında istehsalçılardan barama tədarükü mütəşəkkil qaydada davam etdirilir. Bu günədək kümçülərdən 214 ton 500 kiloqram yaş barama qəbul olunub.
Bu barədə “Şəki-İpək” ASC İdarə Heyətinin sədri Nizami Qəribov məlumat verib.
Rayonlardan tədarük olunan barama əvvəlcə müəssisənin xammal şöbəsinə gətirilir, çeşidlənir, baramanın boğulması prosesi aparılır və yaş barama qurudulmaq üçün yenidən tərəcələrə yığılır.
Səhmdar Cəmiyyətin rəhbərinin bildirdiyinə görə, iyulun əvvəlindən etibarən müəssisənin baramaaçan istehsalatı fəaliyyətə başlayacaq.
Xatırladaq ki, kümçülərə istehsal etdikləri yaş barama məhsulunun hər kiloqramına görə dövlət tərəfindən subsidiya şəkilində 5 manat, “Şəki-İpək” ASC tərəfindən isə 4 manat olmaqla, ümumilikdə, 9 manat ödənilir.
