Şəkidə Çernobıl qəzasının 32-ci ildönümü ilə əlaqədar tədbir keçirilib
Aprelin 26-da Şəkidə Çernobıl qəzasının 32-ci ildönümünə həsr edilmiş tədbir keçirilib.
Şəhər 5 №-li tam orta məktəbin akt zalında keçirilən tədbirdə əvvəlcə qəzada həyatlarını itirmiş insanların xatirəsi bir dəqiqəlik sükutla yad edilib.
Çıxış edən Çernobıl əlilləri yaşadıqlarını məktəblilərlə bölüşüblər. 1986-cı il aprelin 26-da Ukraynanın Çernobl Atom Elektrik Stansiyasının dördüncü blokundakı qəzanın bəşər tarixinin ən dəhşətli fəlakətlərindən biri olduğunu qeyd olunub. Bildirilib ki, keçmiş SSRİ-nin digər respublikalarının nümayəndələri ilə birlikdə Azərbaycandan da 7 mindən çox insan bu qəzanın aradan qaldırılması üçün Çernobıla yola düşüb. Təhlükəli və ağır şəraitdə işləmək onların əksəriyyətinin səhhətinə ciddi təsir göstərib.
Bildirilib ki, ümummilli lider Heydər Əliyev 1993-cü ildə yenidən hakimiyyətə qayıtdıqdan sonra Çernobıl iştirakçılarına göstərilən diqqət və qayğı daha da artmış, bu qəbildən olan insanların maddi-rifah halının daha da yaxşılaşdırılması məqsədilə sərəncamlar imzalanmışdır. Bu istiqamətdə görülən işlər Prezident İlham Əliyev tərəfindən bu gün də uğurla davam etdirilir. Çernobıl faciəsi iştirakçılarının mənzil və məişət şəraiti yaxşılaşdırılır, müalicələri üçün lazımi şərait yaradılır.
Sonda Çernobıl qəzasından bəhs edən sənədli filmə baxış keçirilib.
