Şəkidə 958,5 hektar sahədə tütün əkilib
Bu il Şəki rayonunun təsərrüfatlarında 950 hektar sahədə tütün əkilməsi nəzərdə tutulurdu. Təsərrüfatlarda tütün şitillərinin sahələrə köçürülməsi işi əsasən başa çatıb. Fermerlər planda nəzərdə tutulduğundan da çox sahəyə - 958,5 hektara tütün şitili köçürüblər. İndidən sonra daha 10-15 hektar sahədə tütün əkiləcəyi proqnozlaşdırılır.
Bu barədə AZƏRTAC-ın bölgə müxbirinə Şəki Dövlət Aqrar İnkişaf Mərkəzinin bitkiçilik sektorunun baş məsləhətçisi Sahib Abdulhəmidov məlumat verib.
Baş məsləhətçi bildirib ki, şəkili fermerlər builki mövsümdə 709,5 hektar sahəyə “Virciniya” və 9 hektara “Berley” növ ətirli, 240 hektara isə yerli tütün sortları əkiblər. Tütün əkininə 2100-dən çox işçi cəlb olunub.
Ötənilki mövsüm rayonun tütünçüləri üçün uğurlu olub. Belə ki, 2018-ci ildə şəkili fermerlər 2 min 976 ton quru tütün istehsal ediblər. Tütün istehsalı əvvəlki illə müqayisədə 346 ton artıb.
