Şəkidə dövlət qulluqçularının peşə bayramı qeyd edilmişdir
23 iyun - Dövlət Qulluqçularının peşə bayramı münasibətilə 22 iyun 2013-cü il tarixdə şəhər rəhbərliyi başda olmaqla Şəki Şəhər İcra Hakimiyyətinin əməkdaşları, Şəkidə fəaliyyət göstərən idarə, müəssisə və təşkilatlarda çalışan dövlət qulluqçuları Ümummilli lider Heydər Əliyevin şəhər icra hakimiyyətinin binası qarşısındakı abidəsi önünə gül-çiçək dəstələri düzərək xatirəsini ehtiramla yad etmişlər.
Yuxarı Karvansaray mehmanxana kompleksində keçirilən tədbirində çıxış edən Şəki Şəhər İcra Hakimiyyətinin başçısı Elxan Usubov dövlət qulluqçularını peşə bayramı münasibətilə təbrik etmiş, bu günün təsis edilməsinin əhəmiyyətindən danışmış və Prezident İlham Əliyevin ölkəmizdə müasir dövlət quruculuğu sisteminin, eləcə də vahid dövlət siyasətinin formalaşdırılması və inkişafı sahəsində apardığı islahatlar barədə ətraflı məlumat vermişdir.
Bayram süfrəsi ətrafında keçirilən tədbirdə şəhərimizin incəsənət ustaları maraqlı konsert proqramı ilə çıxış etmişlər.
