Şəkinin orta məktəblərində son zəng sevinci yaşanmışdır
Mayın 30 və 31-də Şəkinin ümumtəhsil məktəblərində son zəng mərasimləri keçirilmişdir. Mərasimlərdə məktəb kollektivləri, yerli icra orqanları və bələdiyyələrin məsul nümayəndələri, valideynlər iştirak etmişlər.
Bayram əhvali-ruhiyyəsi ilə bir neçə saat davam edən mərasimlərdə çıxış edənlər on birinci sinfi yeni başa vuran gənclərə müstəqil həyatda uğurlar arzulamış, onlara cəmiyyətimizə layiqli vətəndaş kimi yetişməyi, elmli və bilikli olmağı, müəllimlərinin etimadını layiqincə doğrultmağı tövsiyyə etmişlər.
Bildirilmişdir ki, əvvəlki tədris ilində rayonun tam orta məktəblərini bitirmiş 1917 məzundan 1166 nəfəri ali məktəblərə qəbul imtahanlarında iştirak etmiş, onlardan 680 nəfəri şərəfli tələbə adını qazanmışdır. Ali məktəbə daxil olanların 145 nəfəri 500-dən, 55 nəfər isə 600-dan yuxarı bal toplamışdır. Məzunlardan 11 nəfəri “Qızıl medal”a layiq görülmüşdür. Bu il isə rayonun tam orta məktəblərini 1724 məzun bitirir.
Son zəng mərasimləri məktəblilərin hazırladıqları rəngarəng bədii proqramlarla davam etmişdir.
