Bu ilin sonunadək Şəkidə 5 yeni məktəb binası istifadəyə veriləcəkdir
Şəkidə təhsil müəssisələrinin maddi-texniki bazasının möhkəmləndirilməsi istiqamətində davamlı tədbirlər həyata keçirilir.
2014-cü ilin sonunadək rayonun kəndlərində daha 5 yeni məktəb binasının istifadəyə verilməsi nəzərdə tutulmuşdur. Hazırda Şin kəndində tam orta məktəb üçün 280, Baş Şabalıd kəndində 120, Qoxmuq kəndində 840, Baş Göynük kəndində 1 nömrəli tam orta məktəb üçün 640 və Göybulaq kəndində ümumi orta məktəb üçün 180 şagird yerlik yeni məktəb binalarının tikintisi sürətlə davam etdirilir. Dövlət vəsaiti hesabına inşa edilən bu məktəb binalarının tikintisinə 2013-cü ildə başlanmışdır.
Bundan əlavə, Heydər Əliyev Fondunun prezidenti, UNESCO-nun və İSESCO-nun xoşməramlı səfiri, Milli Məclisin deputatı Mehriban Əliyevanın rəhbərliyi ilə Fondun cəmiyyətə təqdim etdiyi “Məktəbəqədər təhsil müəssisələrinin inkişafı” proqramı çərçivəsində hazırda Şəki şəhərində hər biri 100 yerlik iki yeni uşaq bağçasının tikintisinə başlanmışdır. Tezliklə şəhərdə 100 yerlik daha bir bağçanın tikintisinə başlanılması nəzərdə tutulur.
