Şəkinin taxılçılıq təsərrüfatlarında arpa biçininə başlanmışdır
Respublikanın ən iri taxılçılıq rayonlarından olan Şəkidə bir neçə gündür ki, arpa biçininə başlanmışdır.
Ötən ilin payızında rayonda cari ilin məhsulu üçün 69 min 152 hektar sahədə taxıl əkilmişdir. Əkin sahələrinin 38 min 841 hektarını buğda, 30 min 311 hektarını isə arpa sahələri təşkil edir.
Şəki taxılçıları biçin kampaniyasına ciddi hazırlaşmışlar. Biçinin mütəşəkkil qaydada və optimal müddətdə başa çatdırılması, məhsulun itkisiz toplanması üçün yerlərdə operativ qərargahlar yaradılmış, yanğından mühafizə tədbirləri görülmüşdür. Taxıl daşınacaq yollar hamarlanmış, anbar və xırmanlar dezinfeksiya olunmuş, texnika saz vəziyyətə gətirilmişdir. Ümumilikdə biçin kampaniyasına 174 ədəd taxılbiçən kombayn, 271 ədəd şum traktoru, 69 ədəd küləş presləyən aqreqat, məhsulun sahələrdən daşınması üçün 310 ədəd yük maşını, traktor və qoşqu, həmçinin 5 ədəd yanğınsöndürən və 9 ədəd su daşıyan maşın cəlb edilmişdir.
Rayonun Sarıca, Şəki kənd, Oxud, Böyük və Kiçik Dəhnə kəndlərinin ərazilərindəki təsərrüfatlarda hələlik arpa biçilir. İndiyədək 1800 hektara yaxın sahənin məhsulu biçilmişdir. İlkin məlumatlara görə, hər hektardan orta məhsuldarlıq 21 sentner təşkil edir.
Təsərrüfatlarda taxıl biçini mütəşəkkil qaydada davam edir.
