Şəkidə “Şahin” hərbi-idman oyunu üzrə respublika birinciliyinin rayon turu keçirilib
Fevralın 25-də Sərhəd Qoşunlarının Şəki şəhərində yerləşən “N” saylı hərbi hissəsində “Şahin” hərbi-idman oyunu üzrə respublika birinciliyinin rayon turunun yarışları keçirilib.
Şəhər Gənclər və İdman İdarəsindən bildiriblər ki, birincilikdə rayonun ümumtəhsil məktəblərini təmsil edən 7 komanda mübarizə aparıb. Tərkibinə 10 oğlan və 4 qız iştirakçının daxil olduğu komandalar sıra hazırlığı, silahın sökülüb yığılması, maneənin dəf edilməsi, sanitarların hazırlığı və digər yarışlarda bacarıqlarını nümayiş etdiriblər.
Birinciliyin qalibi olan şəhər 11 nömrəli tam orta məktəbin komandası apreldə Zaqatalada keçiriləcək zona yarışına vəsiqə qazanıb. Sonrakı yerləri fizika-riyaziyyat təmayüllü liseyin və şəhər 8 nömrəli tam orta məktəbin komandaları tutublar.
Fərqlənən komandalara diplomlar təqdim olunub.
