Şəkidə su təsərrüfatı və meliorasiya işçiləri günü qeyd edilmişdir
İyunun 5-də Şəkidə meliorasiya və su təsərrüfatı işçilərinin peşə bayramı münasibətilə tədbir keçirilmişdir.
Tədbir iştirakçıları əvvəlcə Ulu Öndərin şəhər icra hakimiyyətinin binası qarşısındakı abidəsi önünə gül-çiçək düzüb, xatirəsini ehtiramla yad etmişlər.
Şəki Şəhər İcra Hakimiyyətinin akt zalında keçirilən tədbirdə çıxış edən Şəki Şəhər İcra Hakimiyyətinin başçısı Elxan Usubov respublikamızda su təsərrüfatı və meliorasiya sahəsində həyata keçirilən tədbirlərdən söz açmış, rayonumuzda bu sahədə fəaliyyət göstərən təşkilatların xidmətlərini xüsusi qiymətləndirmiş və su təsərrüfatı və meliorasiya işçilərini peşə bayramı münasibəti ilə təbrik etmişdir.
Tədbirdə çıxış edən Şəki Suvarma sistemləri idarəsinin rəisi Fərahim Qarayev rayonun su təsərrüfatı və meliorasiya işçiləri adından Prezident cənab İlham Əliyevə və Şəki Şəhər İcra Hakimiyyətinin başçısı Elxan Usubova göstərilən diqqət və qayğıya görə dərin minnnətdarlıq bildirmişdir.
Sonda bir qrup su təsərrüfatı və meliorasiya işçisi Şəki Şəhər İcra Hakimiyyətinin fəxri fərmanı ilə təltif edilmiş, onlara qiymətli hədiyyələr təqdim olunmuşdur.
