Şəki şəhərində qəbul və buraxılış imtahanları uğurla yekunlaşıb

Tələbə Qəbulu üzrə Dövlət Komissiyası iyulun 2-də qurumun Şəki regional bölməsinin əhatə etdiyi Şəki şəhərində qəbul və buraxılış imtahanları keçirib.
Qəbul imtahanlarında ali təhsil müəssisələrinin V ixtisas qrupuna (xüsusi qabiliyyət tələb edən ixtisaslara) sənəd verən abituriyentlər, həmçinin tam (11 illik) və ümumi (9 illik) orta təhsil bazasında orta ixtisas təhsili müəssisələrinə (kolleclərə) qəbul olmaq istəyən əvvəlki illərin məzunları iştirak ediblər.
Buraxılış imtahanlarında isə ümumi (9 illik) və tam (11 illik) orta təhsil səviyyələrini əvvəlki dərs illərində başa vurmuş, lakin müxtəlif səbəblərə görə yekun attestasiyası aparılmayan şagirdlər, eləcə də eksternat qaydasında attetasiyada iştirak etmək üçün təhsil aldıqları təhsil müəssisələrinə müraciət etmiş və imtahana buraxılması haqqında həmin təhsil müəssisəsi tərəfindən qərar qəbul edilən şagirdlər, əvvəlki illərdə keçirilən buraxılış imtahanlarında məqbul qiymət ala bilməyən şagirdlər, həmçinin üzrlü səbəbdən 2015-ci ildə keçirilən buraxılış imtahanlarında iştirak edə bilməyən cari ilin məzunu olan şagirdlər iştirak ediblər.
Şəki şəhərində imtahanlar 8, 12 və 20 nömrəli tam orta məktəblərin binalarında, həmçinin fizika-riyaziyyat və humanitar təmayüllü liseydə təşkil olunub. İmtahanlarda ümumilikdə 1845 məzun və şagirdin iştirakı nəzərdə tutulub. İmtahanların idarə olunmasına 13 imtahan rəhbəri və 160 nəzarətçi müəllim ayrılıb.
TQDK-nın Şəki regional bölməsinin müdiri Səbuhi Hüseynovun verdiyi məlumata görə, imtahanlar mövcud təlimata uyğun aparılıb və heç bir qayda pozuntusuna yol verilmədən müəyyən olunmuş vaxtda uğurla başa çatıb.