Şəki şəhərində II və III ixtisas qrupları üzrə qəbul imtahanları keçirilib
İyulun 25-də Tələbə Qəbulu üzrə Dövlət Komissiyası tərəfindən Şəki şəhərində Azərbaycan Respublikasının ali təhsil müəssisələrinə qəbul olmaq istəyən cari ilin məzunları üçün ikinci və üçüncü ixtisas qrupları üzrə qəbul imtahanı keçirib.
İmtahan şəhər 8, 12 və 14 nömrəli tam orta məktəblərdə, həmçinin fizika-riyaziyyat və humanitar təmayüllü liseydə keçirilib. İmtahanda, ümumilikdə 1890 abituriyentin iştirakı nəzərdə tutulub. İmtahanın idarə olunması üçün 14 imtahan rəhbəri və 183 nəzarətçi müəllim ayrılıb.
Təlimata əsasən qəbul imtahanı Şəki şəhərindəki bütün imtahan mərkəzlərində saat 14.00-da başa çatıb.
TQDK-nın Şəki regional bölməsinin müdiri Səbuhi Hüseynovun verdiyi məlumata görə, imtahanın gedişində heç bir qayda pozuntusu qeydə alınmayıb.
