Növbəti “KOB Fest” sərgi-satış yarmarkası Şəkidə keçiriləcək
Növbəti KOB Fest sərgi-satış yarmarkası iyulun 22-də Şəki şəhərində təşkil olunacaq.
Kiçik və Orta Biznesin İnkişafı Agentliyindən (KOBİA) AZƏRTAC-a bildirilib ki, yarmarkada KOB subyektləri tərəfindən istehsal edilən qida və qeyri-qida məhsulları, eləcə də sənətkarların və yaradıcı şəxslərin əl işləri nümayiş olunacaq və satışı həyata keçiriləcək. “KOB Fest” çərçivəsində, həmçinin təhsil, informasiya texnologiyaları, maliyyə və sair xidmət sahələrində bölgədə fəaliyyət göstərən KOB-ların xidmətləri təqdim ediləcək. Festival ərzində mədəni-əyləncəli proqram da keçiriləcək. Şəki Xan Sarayının ərazisində təşkil olunacaq KOB Fest sərgi-satış yarmarkası saat 10:00-dan 20:00-dək ziyarətçilər üçün açıq olacaq.
Qeyd edək ki, bu ilin aprel ayından start götürən “KOB Fest” sərgi-satış yarmarkasının təşkilində məqsəd müvafiq şəhər və rayonlarda fəaliyyət göstərən KOB subyektlərinin istehsal etdiyi məhsulların satışına dəstək olmaq, yerli məhsulları tanıtmaq, eləcə də istehsalçılar və təchizatçılar arasında əlaqələri genişləndirməkdir. Bundan əvvəl “KOB Fest” Bakı, Şəmkir, Gəncə, Lənkəran, Sumqayıt və Quba şəhərlərində təşkil edilib.
