Şəhid olmuş bir qrup hərbi qulluqçumuz orden və medallarla təltif olunub

Azərbaycan Respublikasının Prezidenti cənab İlham Əliyev ölkəmizin  ərazi bütövlüyünün bərpa edilməsi uğrunda gedən döyüş əməliyyatlarında şəhid olmuş Azərbaycan Respublikası Silahlı Qüvvələrinin hərbi qulluqçularının təltif edilməsi haqqında Sərəncam imzalayıb.

Sərəncama əsasən Ermənistan silahlı qüvvələri tərəfindən cari ilin sentyabr ayında dövlət sərhədində törədilən genişmiqyaslı təxribatın qarşısını alarkən şəhidlik zirvəsinə ucalan Şəki şəhərindən olan Azərbaycan Silahlı Qüvvələrinin müddətdən artıq xidmət etmiş hərbi qulluqçusu, əsgər Lətifov Fərid Qiyas oğlu “Azərbaycan Bayrağı” ordeni ilə, Şəkinin Kiçik Dəhnə kəndindən olan əsgər Qasımov Nihat Mehman oğlu 3-cü dərəcəli “Vətənə xidmətə görə” ordeni ilə təltif ediliblər. Hər iki şəhid, eyni zamanda, “Vətən uğrunda” medalı ilə də təltif ediliblər.

Sərəncama əsasən 44 günlük Vətən mübaribəsi dövründə şəhidlik zirvəsinə ucalmış baş gizir Səlimli Bakıxan Alim oğlu, əsgər Babazadə Yolçu Bəhruz oğlu, əsgər İsmayılov Hüseyn Fərman oğlu, əsgər Musayev Rəşadət Vüqar oğlu, əsgər Surxayzadə Zəfər Şəmsəddin oğlu və əsgər Umudlu Elmir Pərviz oğlu 3-cü dərəcəli “Vətənə xidmətə görə” ordeni ilə təltif ediliblər.

Şəhid olmuş hərbi qulluqçular Azərbaycan Respublikasının ərazi bütövlüyünün bərpa edilməsi uğrunda gedən döyüş əməliyyatlarında iştirak edərək igidlik və mərdlik göstərmiş, hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirmişlər.

Şəhidlərimizin xatirəsi dövlətimiz və xalqımız tərəfindən hər zaman uca tutulur və ehtiramla yad edilir.