Şəki Şəhər İcra Hakimiyyətinin başçısı Elxan Usubov Böyük Dəhnə kəndində səyyar qəbul keçirib
Fevralın 3-də Şəki Şəhər İcra Hakimiyyətinin başçısı Elxan Usubov rayonun Böyük Dəhnə kəndinin sakinləri ilə görüşüb.
Səyyar qəbulda başçının müavinləri, aparatın şöbə müdirləri, idarə və müəssisə rəhbərləri, kənd sakinləri iştirak ediblər.
Əvvəlcə Azərbaycan Respublikasının suverenliyi və ərazi bütövlüyü yolunda canını qurban vermiş şəhidlərimizin əziz xatirəsi bir dəqiqəlik sükutla yad edilib.
Şəki Şəhər İcra Hakimiyyətinin başçısı Elxan Usubov çıxış edərək Avropa Şurası Parlament Assambleyasının Azərbaycana qarşı qərəzli davranışından bəhs etmiş, ölkəmizdə uğurla həyata keçirilən dövlət gənclər siyasətindən, gənclərə göstərilən dövlət qayğısından, gənclərin rayonun ictimai-siyasi həyatındakı rolundan, müxtəlif sahələrdə əldə etdikləri uğurlardan danışıb.
Sonra kənd sakinləri Sofuyev Natiq, Rəşidov Oktyabr, Məmmədli Qürbət və başqaları çıxış edərək kənddaxili yolların təmiri və asfatlanması, Böyük Dəhnə kənd 1№-li tam orta məktəbin və kənd uşaq bağçasının əsaslı təmiri, kəndin Balaəhmədli və Hacıəhmədli adlanan hissəsində içməli suyun olmamasını nəzərə alıb iki ədəd subartezian quyusunun qazılması və sair məsələləri xahiş ediblər.
Şəki Şəhər İcra Hakimiyyətinin başçısı Elxan Usubov qaldırılmış məsələlərlə bağlı tapşırıq verib və tövsiyələrini bildirib.
Görüş zamanı narkomaniyanın və erkən nikahın yaratdığı fəsadlar, onların qarşısının alınması sahəsində həyata keçirilən profilaktik tədbirlər haqqında məlumat verilmiş, vətəndaşlar tərəfindən onlara məxsus yaşayış evlərinin sığortalanmasının vacibliyi qeyd olunmuşdur.
