Şəki Şəhər İcra Hakimiyyətinin başçısı Elxan Usubov Çolaxlı kəndinin sakinləri ilə görüşüb
Mayın 2-də Şəki Şəhər İcra Hakimiyyətinin başçısı Elxan Usubov rayonun Çolaxlı kəndinin sakinləri ilə görüşüb.
Səyyar qəbulda başçının müavinləri, aparatın şöbə müdirləri, idarə və müəssisə rəhbərləri, kənd sakinləri iştirak ediblər.
Əvvəlcə Azərbaycan Respublikasının suverenliyi və ərazi bütövlüyü yolunda canını qurban vermiş şəhidlərimizin əziz xatirəsi bir dəqiqəlik sükutla yad edilib.
Şəki Şəhər İcra Hakimiyyətinin başçısı Elxan Usubov çıxış edərək iqlim dəyişmələrinin dünyanı narahat edən qlobal problemlərdən birinə çevrildiyini, ölkəmizin iqlim dəyişmələrinin fəsadlarına qarşı mübarizəyə öz töhfəsini verdiyini qeyd edib, 2024-cü ilin Prezident İlham Əliyev tərəfindən “Yaşıl dünya naminə həmrəylik ili” elan olunduğunu bildirərək bu il çərçivəsində ötən müddət ərzində rayonda görülən işlər haqqında məlumat verib. İcra başçısı Qərbi Azərbaycanla bağlı tarixi məlumatları dünyaya çatdırılması istiqamətində ölkəmizdə ardıcıl tədbirlərin həyata keçirildiyini, Qərbi Azərbaycan İcmasının və Qərbi Azərbaycan TV-nin sosial şəbəkə hesablarının izlənilməsinin, paylaşımların bəyənilməsinin böyük əhəmiyyət daşıdığını bildirib, sakinlərdən bu məsələ ilə bağlı səfərbər olmalarını xahiş edib.
Sonra kənd sakinləri Əliyev Eldar, Ələkbərov Oktay, Əliyev Elşən və başqaları çıxış edərək kənddə yeni artezian quyusunun qazılmasını, “Dəhnə” kanalından götürülən suvarma suyunun kənddə yaxın məsafədən verilməsini, qəzalı vəziyyətdə olan işıq dirəklərinin yenisi ilə əvəz olunmasını və sair məsələləri xahiş ediblər.
Şəki Şəhər İcra Hakimiyyətinin başçısı Elxan Usubov qaldırılmış məsələlərlə bağlı tapşırıq verib və tövsiyələrini bildirib.
Görüş zamanı narkomaniyanın və erkən nikahın yaratdığı fəsadlar, onların qarşısının alınması sahəsində həyata keçirilən profilaktik tədbirlər haqqında məlumat verilmiş, vətəndaşlar tərəfindən onlara məxsus yaşayış evlərinin sığortalanmasının vacibliyi qeyd olunmuşdur.
