Şəki Şəhər İcra Hakimiyyətinin başçısı Elxan Usubov Kiş kəndinin sakinləri ilə görüşüb
Aprelin 2-də Şəki Şəhər İcra Hakimiyyətinin başçısı Elxan Usubov rayonun Kiş kəndinin sakinləri ilə görüşüb.
Səyyar qəbulda başçının müavinləri, aparatın şöbə müdirləri, idarə və müəssisə rəhbərləri, kənd sakinləri iştirak ediblər.
Əvvəlcə Azərbaycan Respublikasının suverenliyi və ərazi bütövlüyü yolunda canını qurban vermiş şəhidlərimizin əziz xatirəsi bir dəqiqəlik sükutla yad edilib.
Şəki Şəhər İcra Hakimiyyətinin başçısı Elxan Usubov çıxış edərək 1918-ci ilin mart-aprel aylarında azərbaycanlılara qarşı törədilmiş soyqırımı cinayətlərindən bəhs etmiş, Ermənilərin tarix boyu xalqımıza qarşı törətdikləri bütün cinayətlərin cavabının 2020-ci ilin sentyabrında başlayan və 44 gün davam edən Vətən müharibəsində verildiyini, şəhidlərimizin qısasının Azərbaycan Ordusu tərəfindən Müzəffər Ali Baş Komandan İlham Əliyevin rəhbərliyi ilə döyüş meydanında aldığını vurğulamışdır.
Sonra kənd sakinləri, şəhid anası Cavadova Dursun, Məsimov Elşad, Ramazanov Ələddin və başqaları çıxış edərək şəhid Aqşin Abdullayevin vaxtilə yaşadığı evə gedən yola fərş döşənməsi, Kiş həkim məntəqəsinin əsaslı təmiri, köhnə elektrik dirəklərinin dəyişdirilməsi, “Duluzlar” məhəlləsinə marşrut xətti açılması və sair məsələləri xahiş ediblər.
Şəki Şəhər İcra Hakimiyyətinin başçısı Elxan Usubov qaldırılmış məsələlərlə bağlı tapşırıq verib və tövsiyələrini bildirib.
Görüş zamanı narkomaniyanın və erkən nikahın yaratdığı fəsadlar, onların qarşısının alınması sahəsində həyata keçirilən profilaktik tədbirlər haqqında məlumat verilmiş, vətəndaşlar tərəfindən onlara məxsus yaşayış evlərinin sığortalanmasının vacibliyi qeyd olunmuşdur.
