Şəki Şəhər İcra Hakimiyyətinin başçısı Elxan Usubov Qumux kəndinin sakinləri ilə görüşüb

Dekabrın 1-də Şəki Şəhər İcra Hakimiyyətinin başçısı Elxan Usubov Qumux kəndinin sakinləri ilə görüşüb.

Səyyar qəbulda başçının müavinləri, aparatın şöbə müdirləri, idarə və müəssisə rəhbərləri, kənd sakinləri iştirak ediblər.

Əvvəlcə Azərbaycan Respublikasının suverenliyi və ərazi bütövlüyü yolunda canını qurban vermiş şəhidlərimizin əziz xatirəsi bir dəqiqəlik sükutla yad edilib.

Şəki Şəhər İcra Hakimiyyətinin başçısı Elxan Usubov çıxış edərək cari ilin 24 noyabr tarixində Bakıda, Heydər Əliyev Mərkəzində BMT-nin Mərkəzi Asiya Ölkələrinin İqtisadiyyatları üçün Xüsusi Proqramının – SPECA-nın iştirakçı ölkələrinin dövlət və hökumət başçılarının Zirvə görüşündə Prezident İlham Əliyevin çıxışından bəzi fikirləri görüş iştirakçılarının nəzərinə çatdırıb, son dövrlər ölkəmizdə ictimai-siyasi sahədə baş vermiş mühüm hadisələrdən, Vətən müharibəsində düşmən üzərində qazanılmış tarixi Qələbədən, rayonda aparılan quruculuq, bərpa işlərindən, qarşıda duran vəzifələrdən danışıb.

Sonra kənd sakinləri Xasməmmədov Arif,  İsmayılova Zənfirə və başqaları çıxış edərək Aşağı Göynük kəndindən Qumux kəndinə gedən mərkəzi yolun ətrafında olan kol-kosun təmizlənməsi, kəndə təbii qazın verilməsi, Cunud kəndi ilə Baş Layısqı kəndini birləşdirən yola asfalt örtüyün çəkilməsi və sair məsələləri xahiş ediblər.

Şəki Şəhər İcra Hakimiyyətinin başçısı Elxan Usubov qaldırılmış məsələlərlə bağlı tapşırıq verib və tövsiyələrini bildirmişdir.