Şəki Şəhər İcra Hakimiyyətinin başçısı Elxan Usubov Sarıca kəndində səyyar qəbul keçirib.
Fevralın 18-də Şəki Şəhər İcra Hakimiyyətinin başçısı Elxan Usubov rayonun Sarıca kəndinin sakinləri ilə görüşüb.
Səyyar qəbulda Şəki şəhər-rayon polis şöbəsinin rəisi, başçının müavinləri, aparatın şöbə müdirləri, idarə və müəssisə rəhbərləri, kənd sakinləri iştirak ediblər.
Əvvəlcə Azərbaycan Respublikasının suverenliyi və ərazi bütövlüyü yolunda canını qurban vermiş şəhidlərimizin əziz xatirəsi bir dəqiqəlik sükutla yad edilib.
Şəki Şəhər İcra Hakimiyyətinin başçısı Elxan Usubov çıxış edərək son dövrlər rayon ərazisində görülmüş işlərdən, qarşıda duran vəzifələrdən danışıb.
Sonra kənd sakinləri İmamverdiyev Tahir, Süleymanov Pərviz, Məmmədova Samirə və başqaları çıxış edərək kəndarası yolların qum-çınqıl daşınaraq hamarlanması, Sarıca kənd tam orta məktəbi üçün əlavə sinif otaqlarının tikilməsinə köməklik göstərilməsi, məktəbə gedən yolun 380 metrlik hissəsinin əsaslı təmiri, kənd uşaq bağçası üçün yeni binanın tikilməsi və sairə məsələləri xahiş ediblər.
Qaldırılmış məsələlərin bir hissəsi ilə bağlı sakinlərə müvafiq izahatlar, digər məsələlərlə bağlı aidiyyəti şəxslərə lazımi tapşırıqlar verilib.
