Şəkidə Beynəlxalq Ana Dili Günü münasibətilə müxtəlif tədbirlər keçirilib
Fevralın 21-i bütün dünyada Beynəlxalq Ana Dili Günü kimi qeyd olunur. Bu münasibətlə Şəki şəhərində fəaliyyət göstərən təşkilatlarda, təhsil, mədəniyyət müəssisələrində müxtəlif tədbirlər təşkil olunub.
Keçirilən tədbirlərdə Beynəlxalq Ana Dili Gününün yaranma tarixindən danışılıb, bu əlamətdar günün dünyada geniş qeyd olunduğu diqqətə çatdırıb, Azərbaycan dilinin tarixi, keçdiyi inkişaf yolu, dilimizə dövlət tərəfindən göstərilən qayğıdan bəhs olunub. Bildirilib ki, milli-mənəvi dəyərlərimiz sırasında xüsusi yeri olan Azərbaycan dili mövcud olduğu tarixi dövrlər ərzində zəngin inkişaf yolu keçib. Ana dilinin saflığının qorunması və gələcək nəsillərə ötürülməsinin önəminə toxunulub. dilimizi yad ünsürlərdən qorumağın, dilin tədrisi məsələsinə ciddi yanaşmağın zəruriliyini vurğulanıb.
Qeyd olunub ki, ölkəmizdə ana dilinin hərtərəfli inkişafı, beynəlxalq münasibətlər sisteminə yol tapması Ulu Öndər Heydər Əliyevin dilimizin qorunmasına yönələn düşünülmüş siyasətinin nəticəsidir. Hazırda bu siyasəti Prezident İlham Əliyev uğurla davam etdirməkdədir.
Tədbirlərdə Beynəlxalq Ana Dili Gününə həsr olunan videoçarxlar nümayiş etdirilib, məktəblilərin təqdimatında musiqi nümunələri təqdim olunub, doğma dilimizə həsr edilən şeirlər səsləndirilib, ana dilimizə sevgi hisslərinin əks olunduğu ədəbi-bədii kompozisiyalar nümayiş edilib.
