Şəkidə şəhid ailələri üçün bayram süfrəsi açılıb
Aprelin 3-də Şəki Şəhər İcra Hakimiyyəti tərəfindən Ramazan bayramı münasibətilə şəhid ailələri üçün bayram süfrəsi təşkil olunub. Tədbirdə şəhər rəhbərliyi, şəhid ailələrinin üzvləri iştirak edib.
Bayram süfrəsində əvvəlcə şəhidlərimizin əziz xatirələri bir dəqiqəlik sükutla yad edilib, onların ruhuna dualar oxunub, müqəddəs Ramazan ayının fəzilətlərindən bəhs edilib.
Bayram tədbirində çıxış edən Şəki Şəhər İcra Hakimiyyətinin başçısı Elxan Usubov görüş iştirakçılarını Ramazan bayramı münasibətilə təbrik edib. İcra başçısı 44 günlik Vətən Müharibəsində Prezident, Müzəffər Ali Baş Komandan İlham Əliyevin rəhbərliyi altında rəşadətli ordumuzun 30 il işğal altında olan torpaqlarımızı azad edərək qazandığı tarixi Qələbədən bəsh edib. Qələbəni bizlərə qanları ilə bəxş edən şəhidlərimizin, sağlamlıqlarını bu yolda qoyan qazilərimizin hər zaman dövlətin diqqəti və qayğısı ilə əhatə olunduğunu vurğulayıb.
Tədbirdə çıxış edən Millət vəkili Vüqar İskəndərov Müzəffər Ali Baş Komandan İlham Əliyevin rəhbərlik etdiyi şanlı Ordumuzun tarixi torpaqlarımızı düşmən işğalından azad edərək tarixi ədaləti bərqərar etməsini hər bir azərbaycanlının fəxr, qürur mənbəyi olduğunu diqqətə çatdırıb, Vətənimizin ərazi bütövlüyünün təmin olunması uğrunda mübarizədə şəhidlərimizin, qazilərimizin, müharibə iştirakçılarının şücaətlərini yüksək dəyərləndirib.
Tədbirdə çıxış edən Fövqəladə Hallar Nazirliyinin nümayəndəsi nazirliyin Həmkarlar İttifaqının təşkilatçılığı və Qarabağ Dirçəliş Fondunun dəstəyi ilə Zəngilan rayonu ərazisində ağacəkmə aksiyası keçirildiyini bildirib, bu münasibətlə hazırlanmış ianə sertifikatlarını tədbirdə iştirak edən şəhid analarına təqdim edib.
Tədbirdə çıxış edən şəhid ailələrinin üzvləri göstərilən yüksək diqqət və qayğıya görə Prezident İlham Əliyevə və Birinci vitse-prezident Mehriban Əliyevaya təşəkkürlərini bildiriblər.
Bayram süfrəsində yerli incəsənət ustaları maraqlı konsert proqramı ilə çıxış ediblər.
