Şəkidə tanınmış bərpaçı-memar Sehran Məmmədova həsr olunmuş tədbir keçirilib
Noyabrın 30-da Çingiz Mustafayev adına klubda tanınmış bərpaçı-memar Sehran Məmmədova həsr olunmuş tədbir keçirilib.
Tədbirdə bərpaçı-memar Sehran Məmmədovun memarlıq sənətinin inkişafındakı xidmətlərindən, tarixi-memarlıq abidələrin bərpası sahəsində gördüyü işlərdən bəhs olunmuş, onun haqqında hazırlanmış qısametrajlı film nümayiş olunub.
Tədbirdə çıxış edən Şəki Şəhər İcra Hakimiyyətinin başçısı Elxan Usubov, ANS Şirkətlər Qrupunun rəhbəri Vahid Mustafayev Sehran Məmmədovun Şəki şəhərinin milli memarlıq üslubunun qorunub saxlanılması, tarix-memarlıq abidələrinin bərpası istiqamətində göstərdiyi xidmətlərdən danışıblar.
Sonra bərpaçı-memar Sehran Məmmədova Şəki Şəhər İcra Hakimiyyətinin Fəxri Fərmanı və VMF Şirkəti tərəfindən xüsusi hazırlanmış saat hədiyyə olaraq təqdim olunub.
Sonda bərpaçı-memar Sehran Məmmədov çıxış edərək ona göstərilən diqqətə görə tədbirin təşkilatçılarına təşəkkürünü bildirib.
