Zəfər Günü ilə bağlı Şəkidə silsilə tədbirlər keçirilir
Tariximizin ən parlaq səhifəsi, Azərbaycan xalqının iftixar və qürur mənbəyi olan 8 Noyabr - Zəfər Günü ilə bağlı Şəki şəhərində silsilə tədbirlər keçirilir.
Rayon ərazisində fəaliyyət göstərən idarə və təşkilatlarda konfranslar, dəyirmi masalar, bədii-musiqili tədbirlər keçirilir, təhsil müəssislərində gənclər və yeniyetmələr arasında vətənpərvərlik ruhunun yüksəldilməsi məqsədilə olimpiadalar, müsabiqələr, sərgilər, mühazirələr, idman yarışları təşkil olunur. Təhsil müəssisələrində keçirilən tədbirlərdə Vətənə olan sədaqət, zəfər, qəhrəmanlıq hisslərini əks etdirən şeirlər, kompozisiyalar təqdim olunur.
Zəfər Günü ilə əlaqədar şəhərin mərkəzində tərtibat işləri aparılmış, binaların eyvanları üzərində Azərbaycan bayrağı asılmış, müxtəlif yerlərdə Xarı Bülbül embleminin əks olunduğu banerlər qoyulmuşdur.
Noyabr ayının 8-də Şəki şəhər Heydər Əliyev Mərkəzində Zəfər Gününə həsr olunmuş rəsmi tədbir keçiriləcək, Vətən müharibəsi şəhidinin xatirəsinə həsr olunmuş film nümayiş olunacaq, şəhərin mərkəzindəki meydanda bayram konserti təşkil olunacaq, axşam saatlarında atəşfəşanlıq olacaqdır.
