Şuranın 2024-cü il üçün hesabatı

Şəki Şəhər İcra Hakimiyyəti yanında İctimai Şuranın 2024-cü ildə

fəaliyyətinə dair

HESABATI

Şəki Şəhər İcra Hakimiyyəti yanında İctimai Şura 2024-cü ildə Şəki Şəhər İcra Hakimiyyəti ilə yerli ictimaiyyət arasında səmərəli qarşılıqlı fəaliyyətin təşkili, qərarların qəbulu zamanı ictimai rəyin və vətəndaşların qanuni maraqlarının nəzərə alınması istiqamətində fəaliyyət göstərmişdir.

Hesabat dövründə Şəki Şəhər İcra Hakimiyyəti yanında İctimai Şuranın üzvlərinin mühüm əhəmiyyətli tədbirlərdə, ictimai maraq doğuran məsələlərin müzakirə olunduğu konfranslarda, seminarda, dəyirmi masalarda iştirakı təmin edilmişdir.

Müddət ərzində Şəki Şəhər İcra hakimiyyəti yanında İctimai Şuranın üzvləri ictimai əhəmiyyət kəsb edən məsələlər barədə əhalinin müxtəlif təbəqələrinin rəy və təkliflərini, onları narahat edən problemləri öyrənmək məqsədilə görüşlər, ictimai müzakirələr keçirmişdir.

2024-cü il ərzində Şəki Şəhər İcra Hakimiyyəti tərəfindən ictimai iştirakçılığın tətbiqinin genişləndirilməsi istiqamətində tədbirlər davam etdirilmişdir. 02.07.2024-cü il tarixdə ADPU-nun Şəki filialında "İctimai iştirakçılıq bacarıqlarının artırılması" mövzusunda təlim keçirilmişdir. “Konstitusiya” Araşdırmalar Fondu ilə “Hüquq və İnkişaf Mərkəzi” İctimai Birliyinin təşkilatçılığı ilə keçirən təlimdə Şəki Şəhər İcra Hakimiyyəti yanında İctimai Şuranın üzvləri, Şəkidə fəaliyyət göstərən orta ixtisas təhsili müəssisələrinin və ADPU-nun Şəki filialının əməkdaşları, eləcə də ictimaiyyət nümayəndələri iştirak etmişlər. Təlimdə ictimai nəzarət və ictimai nəzarət üsulları, qadınların ictimai iştirakçılıqda rolunun artırılması, İctimai Şuraların hüquqları, vəzifələri, səlahiyyətləri, İctimai Şuraya seçkilərin qaydaları, Təşəbbüs qruplarının yaradılması və s. haqqında ətraflı məlumat verilmiş, iştirakçıları maraqlandıran suallar cavablandırılmışdır.

Şəki Şəhər İcra hakimiyyəti yanında İctimai Şuranın fəaliyyətinin səmərəliyinin təmin edilməsi məqsədilə şəhər icra hakimiyyətinin yeni inzibati binasında İctimai Şuraya istifadə üçün ayrıca otaq ayrılmışdır. İctimai Şuranın feysbuk sosial şəbəkə hesabı vasitəsilə fəaliyyəti ilə bağlı materiallar paylaşılır. İşin səmərəliliyini və operativliyini təmin etmək üçün Şəki Şəhər İcra hakimiyyəti yanında İctimai Şuranın votsap qrupu fəaliyyət göstərir.

Hesabat dövründə Şəki Şəhər İcra Hakimiyyəti yanında İctimai Şuranın üzvləri şəhid, qazi  ailələrini ziyarət etmiş, onların problemləri ilə maraqlanmışlar.

İctimai Şuranın fəaliyyətinin gücləndirilməsi istiqamətində zəruri tədbirlər həyata keçirilir.